Fræddust um fjölbreytta hreyfingu í Frjálsíþróttaskóla UMFÍ

Frjálsíþróttaskóli UMFÍ var haldinn á Selfossi dagana 12-16. júni.  Alls voru 44 frískir krakkar á aldrinum 11-14 ára sem kláruðu skólann. Skólinn heppnaðist mjög vel og fóru krakkarnir ánægðir heim. Flest börnin komu frá HSK svæðinu en einnig voru krakkar úr Hafnafirði, Reykjavík, Vík og Blönduósi.  

Markmið skólans er að kynna og breiða út frjálsíþróttir á Íslandi. Dagskrá skólans var mjög fjölbreytt þar sem til að mynda var kvöldvaka, fræðsla um svefn og viðtal við afreksíþróttakonuna Ásdísi Hjálmsdóttur.

Ásamt því var fjölbreytt hreyfing allt frá hefbundnum frjálsíþróttaæfingum, til sundsprells og ratleiks. Í ár var Sigríður Anna Guðjónsdóttir, Íslandsmethafa í þrístökki, landsliðkonurnar Hrafnhildur Eir Hermóðsdóttir og Hulda Þorsteinsdóttir, Teitur Örn Einarsson handboltamaður og spjótkastari á meðal í skólanum.

Krakkarnir voru hæst ánægðir að fá að læra af þessum stjörnum.  

Skólinn fór fram við frábærar aðstæður þar sem stutt er í alla aðstöðu, til að mynda gistiaðstöðuna í Vallaskóla, frjálsíþróttavöllinn og sundlaugina.  

Skólinn gegnir mikilvægu hlutverki í að opna augu ungmenna fyrir ágæti íþróttaiðkunar og styðja fjölmargar rannsóknir þá fullyrðingu að ungmenni sem stunda íþróttir leiðast síður út í óreglu síðar á lífsleiðinni. Síðast en ekki síst öðlast ungmennin tækifæri til að kynnast hvert öðru og mynda tengslanet og auka hæfni sína í mannlegum samskiptum.

Frjálsíþróttaskólanum lauk með velheppnuðu frjálsíþróttamóti á laugardeginum þar sem að nokkrir persónulegir sigrar unnust. Eftir grillveislu fengu krakkarnir viðurkenningaskjöl fyrir þátttöku í skólanum og kvöddust sátt og sæl eftir skemmtilega viku.

Skólinn vill þakka öllum þeim fjölda fyrirtækja sem lögðu þeim lið, sá stuðningur er ómetanlegur, en þau voru: MS, Nettó, Sölufélag Garðyrkjubænda, Kjúklingabúið Vor, Hafnarnes Ver, Almarsbakarí, Guðni bakari, Myllan, Heilsa, Kjörís, Tiger og Kökugerð HP.

Fleiri myndir má sjá hér.