Gamlir vinir keppa saman á ný á Landsmóti UMFÍ 50+
Bóndinn og skrifstofustjórinn Ingveldur H. Ingibergsdóttir tók þátt í Landsmóti UMFÍ 50+ í fyrsta sinn í Hveragerði árið 2017. Hún segir mótið vera flott. Ingveldur er ein þeirra sem prýða kynningarefni Landsmóts UMFÍ 50+. Myndin hér af Ingveldi, sem er í miðjunni, var tekin þegar hún var nýorðin fimmtug og mætti á sitt fyrsta mót í Hveragerði árið 2017. Þar tók hún þátt í ýmsum greinum.
„Ég hef verið með annan fótinn í frjálsum íþróttum. Ég keppti í þeim þegar ég var yngri og var um tíma starfsmaður og þjálfari og í stjórn Frjálsíþróttasambandsins. Í aðdraganda mótsins í Hveragerði myndaðist stemning í vinkvennahópnum. Gamlir vinir fóru að ýta á hinar vinkonurnar að taka þráðinn upp að nýju og taka þátt. Við vinkonurnar fórum í Hveragerði. Þar tók ég þátt í frjálsum, utanvegahlaupi og auðvitað stígvélakastinu. Aðrar fóru líka í sund,“ segir Ingveldur.
„Mér fannst þetta rosalega flott mót og félagsskapurinn fínn. Ég skemmti mér líka mjög vel,“ segir Ingveldur.
Það var glatt á hjalla hjá þeim Ingveldi, Kristínu Kristjánsdóttur og Ólöfu Jónsdóttur þegar þær urðu fremstar í utanvegahlaupi í Hveragerði. Allar tóku þær þátt í nokkrum greinum.
Viðtalið við Ingveldi er í blaði Landsmóts UMFÍ 50+ sem er nýkomið út. Blaðið má lesa á Netinu. Þar er líka allt um greinarnar sem í boði eru og öll dagskrá mótsins. Smelltu á hlekkinn hér að neðan og þar geturðu lesið blaðið:
Með hverjum ætlar þú á Landsmót UMFÍ 50+ í Neskaupstað dagana 28. - 30. júní?
Skráningu á Landsmót UMFÍ 50+ í Neskaupstað lýkur þriðjudaginn 25. júní
Allar upplýsingar um mótið er að finna hér og þar geturðu líka skráð þig: Landsmót UMFÍ 50+
Hér eru fleiri myndir frá Landsmóti UMFÍ 50+
Sjáumst í Neskaupstað!