Hertar aðgerðir á íþróttastarfi taka gildi á höfuðborgarsvæðinu
Heilbrigðisráðherra hefur fallist á tillögur sóttvarnalæknis um hertar samkomutakmarkanir á höfuðborgarsvæðinu og taka þær gildi á morgun, 7. október og vara þær til 19. október.
Samkomutakmarkanir sem kynntar voru í gær gilda óbreyttar annars staðar á landinu.
Með höfuðborgarsvæðinu er átt við Reykjavík, Seltjarnarnesbæ, Mosfellsbæ, Kjósarhrepp, Hafnarfjarðarkaupstað, Garðabæ og Kópavog.
Markmið takmörkunarinnar er að hægja eins og unnt er á útbreiðslu COVID-19 sjúkdómsins.
Hertar aðgerðir fela í sér:
- Íþróttir og líkamsrækt innandyra óheimil: Líkamsrækt, íþróttastarf og sambærileg starfsemi sem krefst snertingar eða hætta er á snertingu á milli fólks eða mikilli nálægð, eða þar sem notkun á sameiginlegum búnaði getur haft smithættu í för með sér er óheimil innandyra.
- Íþróttir utandyra: Íþróttir utandyra eru heimilar en áhorfendur á íþróttaviðburðum utandyra skulu ekki vera fleiri en 20 í hverju rými. Fjöldi áhorfenda miðaðist áður við 100 í hverju rými. Áhorfendur skulu jafnframt bera grímu og sitja í merktum sætum.
- Nálægðarmörk 2 metrar: Nálægðarmörk verða 2 metrar. Það á einnig við í öllum skólum, að undanskildum börnum fæddum 2005 og síðar.
- Sund- og baðstaðir: Sund- og baðstöðum verður lokað
Börn fædd 2005 og síðar:
- Skólasund: Þrátt fyrir lokun sundstaða er heimilt að halda úti skólasundi fyrir börn fædd 2005 og síðar.
- Íþrótta- og æskulýðsstarfsemi og tómstundir barna sem eru fædd 2005 og síðar er heimil.
- Keppnisviðburðir: Keppnisviðburðir barna sem fædd eru 2005 og síðar þar sem hætta er á blöndun hópa umfram hefðbundnar æfingar eru óheimilir.
- Nálægðar- og fjöldamörk: Líkt og áður gilda nálægðar- og fjöldamörk ekki um börn fædd 2005 og síðar.
Reglugerð um takmörkun á samkomum vegna farsóttar
Reglugerð um 1. br. á reglugerð um takmökun á samkomum vegna farsóttar (tekur gildi 7. okt.)
Reglugerð um takmörkun á skólastarfi vegna farsóttar
Reglugerð um 1. br. á reglugerð um takmörkun á skólastarfi vegna farsóttar (tekur gildi 7. okt.)