Iðkendum fjölgar gríðarlega í Eyjafjarðarsveit
Eftir að sveitarfélagið hóf að styrkja æfingar fólks í heimabyggð breyttust forsendur hjá Ungmennafélaginu Samherjum. Greinum fjölgaði og auðveldara varð að fá þjálfara. Formaður félagsins segir ungmennafélagsandann skila félaginu miklu.
„Það er mikill ungmennafélagsandi hjá okkur, hann svífur yfir öllu og það gengur vel,“ segir Berglind Kristinsdóttir, formaður Ungmennafélagsins Samherja í Eyjafjarðarsveit. Iðkendum hjá félaginu hefur fjölgað um mörg hundruð prósent í þessu litla sveitarfélagi á milli ára. Á félagssvæðinu í Hrafnagilshverfi hefur íbúum fjölgað ört og eru þeir nú um 300.
Berglind segir að það hafi gert gæfumuninn að sveitarfélagið hætti að veita fólki styrk til þess að stunda íþróttir auk þess sem tímatafla íþróttafélagsins var tilbúin áður en skólaárið hófst haustið 2018.
Fólk vill æfa í heimabyggð
„Við erum í samkeppni við Akureyri. Þegar þeir sem hér búa vildu taka þátt í skipulögðu tómstundastarfi í einhverju sem var ekki í boði heima heldur á Akureyri gat fólk fengið styrk fyrir því. Þessu var hætt í fyrra (árið 2017). Þess í stað fór sveitarfélagið að greiða meira til íbúa í sveitinni sem stunda íþróttir og aðrar tómstundir í heimabyggð,“ segir Berglind.
Líka má nefna að það gekk vel að ráða flotta þjálfara og að ganga frá tímatöflu sem gerir ráð fyrir æfingum barna og ungmenna í frístundum eða strax eftir skóla, það er að segja frá klukkan 14 til 16.
„Þetta gerir yngstu börnunum kleift að æfa allar þær greinar sem við bjóðum upp á. Engu skiptir hvort þau æfa eina grein eða fleiri. Gjaldið er eitt, 10.000 krónur á önn,“ segir Berglind. Það sama á við um unglingastigið. En ungmennin geta líka skráð sig í tíma fyrir fullorðna, svo sem í bandí, þrektíma, blak, zumba, badminton og fleira. Fullorðnir greiða 15.000 krónur fyrir önnina og geta valið úr fjölda greina. Flestir fullorðinna í Eyjafjarðarsveit velja þó að æfa aðeins eina grein.
Handverkshátíðin er lykill að íþróttastarfinu
Berglind segir þessa þrjá þætti skila því að Ungmennafélagið Samherjar geti boðið upp á meira úrval en áður í skipulögðu tómstunda- og æskulýðsstarfi og fjölgað iðkendum svo mikið sem raunin er.
Berglind bendir þó á að fjórða þáttinn vanti. Hann sé stór hluti í starfi Samherja enda er ungmennafélagsandinn alltumlykjandi í því verkefni. Það er handverkshátíðin sem haldin hefur verið á hverju ári í rétt rúma kvartöld og er ein elsta bæjarhátíð landsins.
„Handverkshátíðin er í raun samfélagslegt verkefni á vegum sveitarfélagsins. Ungmennafélagið Samherjar, kvenfélögin þrjú, björgunarsveitin, hestamannafélagið, Lionsklúbburinn og búsögusafnið standa að henni og skipta með sér verkum. Við í Samherjum sjáum um uppsetningu hátíðarinnar með félögum í björgunarsveitinni og sjáum um veitingasöluna. Meira að segja börnin taka þátt. Þau eru hlauparar og hlaupa með smurt brauð á bakka úr eldhúsi og fram í veitingasöluna, standa vaktir með vinum og mömmum vina sinna og vinkvenna. Þarna eru líka ömmur sem fá mörg rokkstig. Þær eru kannski á vakt hjá kvenfélaginu en koma svo niður í eldhúsið til að baka pönnukökur því að þær eiga barnabörn í ungmennafélaginu. Þetta er auðvitað álagstími í fjóra daga. En þetta eru skemmtilegir dagar. Ungmennafélagsandinn svífur yfir hátíðinni og allir leggja sitt af mörkum. Við fáum ágóða af veitingasölunni og skiptum launum fyrir verk okkar á þessari fjögurra daga hátíð með björgunarsveitinni. Þarna fáum við annað eins ef ekki meira en sem nemur styrk sveitarfélagsins til Ungmennafélagsins Samherja. Afraksturinn af vinnunni, sem allir inna af hendi, gerir félaginu kleift að bjóða upp á fjölbreytta tímatöflu og frábæra þjálfara,“ segir Berglind Kristinsdóttir, formaður Ungmennafélagsins Samherja.
Greinin birtist í síðasta tölublaði Skinfaxa, tímariti UMFÍ. Hægt er að lesa allt blaðið á netinu með því að smella á hlekkinn hér að neðan: