Samkomutakmarkanir innleiddar að nýju
Hámarksfjöldi þeirra sem mega koma saman verður 200 og nálægðarregla tekin upp þegar nýjar reglur um takmarkanir á samkomum taka gildi sunnudaginn 25. júlí. Eins metra nándarregla verður tekin upp að nýju, grímuskylda innleidd á ný þar sem ekki er unnt að viðhafa 1 metra reglu.
Íþróttaæfingar og -keppnir barna og fullorðinna heimilar með og án snertinga með 100 manna hámarksfjölda. Hámarksfjöldi áhorfenda 200 manns í rými sem skulu skráðir í sæti. Veitingasala óheimil á keppnisstöðum.
Þetta er meginefni nýrrar reglugerðar Svandísar Svavarsdóttur heilbrigðisráðherra um takmarkanir á samkomum vegna COVID-19. Samkomutakmarkanir eru hugsaðar til skamms tíma á meðan verið er að ná tökum á mikilli fjölgun smita síðustu daga, að því er segir í frétt frá ráðuneytinu á vefsíðu Stjórnarráðsins.
Samkomutakmarkanir taka gildi 25. júlí og gilda til og með 13. ágúst.
Breytingarnar eru í samræmi við tillögur sóttvarnalæknis, með þeirri breytingu að höfðu samráði við sóttvarnalækni að hámarksfjöldi í erfidrykkjum verður 200 manns.
Á vefsíðu Stjórnarráðsins segir að mikilvægt er talið að grípa eins fljótt og auðið er til takmarkana innanlands til að koma böndum á aukna útbreiðslu smita. Með mikilli útbreiðslu og smiti hjá viðkvæmum hópum er hætt við alvarlegum afleiðingum.
HELSTU TAKMARKANIRNAR ERU ÞESSAR
- Almennar fjöldatakmarkanir verða 200 manns. Börn fædd 2016 og síðar eru undanþegin.
- Nándarregla verður almennt 1 metri. Börn fædd 2016 og síðar verði undanþegin.
- Grímuskylda verður tekin upp innanhúss og þar sem ekki er unnt að viðhafa 1 metra reglu. Börn fædd 2006 og síðar eru undanþegin.
- Hámarksfjöldi viðskiptavina í verslunum verði 200.
- Íþróttaæfingar og -keppnir barna og fullorðinna heimilar með og án snertinga með 100 manna hámarksfjölda. Hámarksfjöldi áhorfenda 200 manns í rými sem skulu skráðir í sæti. Veitingasala óheimil á keppnisstöðum.
- Heilsu- og líkamsræktarstöðvum sem og sund- og baðstöðum verður heimilt að hafa opið fyrir 75% af hámarksfjölda leyfilegra gesta. Sameiginlegan búnað skal sótthreinsa milli notenda.
- Söfnum verður heimilt að taka á móti 75% af leyfilegum hámarksfjölda gesta.
- Æfingar og sýningar sviðslista og sambærilegrar starfsemi heimilar með allt að 100 manns á sviði. Hámarksfjöldi áhorfenda 200 manns í rými, svo sem í bíóhúsum. Heimilt að hafa hlé en enga veitingasölu í hléum. Skrá skal gesti í sæti.
- Hámarksfjöldi gesta við athafnir trú- og lífsskoðunarfélaga verður 200.
- Opnunartími veitingastaða, skemmtistaða o.þ.h. verður til kl. 23:00 (tæma þarf staði fyrir miðnætti) og hámarksfjöldi gesta 100 manns í rými. Vínveitingar bornar fram til sitjandi gesta. Skrá skal gesti.
- Tjaldstæði og hjólhýsasvæði fari eftir leiðbeiningum sóttvarnalæknis og Ferðamálastofu.