Sandkastalar, blindrabolti og heilmikið fjör á Sauðárkróki
Hvað langar þig að gera?
Heilmikið verður um að vera á Unglingalandsmóti UMFÍ á Sauðárkróki um verslunarmannahelgina annað en keppni í íþróttum. Þar verður líka hægt að fara niður i fjöru og búa til sandkastala. Skóflur, fötur og allskonar áhöld verða á staðnum og eru allir velkomnir.
Þetta er bara einn viðburður af veislunni sem Unglingalandsmótið er í raun. Þarna verður líka sundlaugarpartý í sundlauginni, blindrafótbolti, jóga og slökun, strandhlaup, kynning og borðtennis, fimleikafjör sem hópur landsliðsfólks í fimleikum stendur fyrir. Þar verður líka hægt að taka þátt og prófa undir styrkri og öruggri leiðsögn landsliðsfólks.
Andrew Henderson, margfaldur heimsmeistari í freestyle football, verður á svæðinu og heldur vinnubúðir fyrir alla þátttakendur mótsins, hægt verður að spila bandý, prófa að skjóta af bogum og horfa á hópinn BMX Brós sína listir sínar á BMX-hjólum.
Til viðbótar við allt þetta verður bæjarganga með leiðsögn, júdókynning og tónleikar öll kvöldin.
Yfirleitt þarf ekki að skrá sig sérstaklega á þessa viðburði heldur bara mæta og taka þátt.
Skráning er í fullum gangi á umfi.is og er hægt að skrá þátttakendur á aldrinum 11-18 ára í allan þann fjölda greina sem í boði er á mótinu til mánudagsins 31. júlí næstkomandi.
