Sandra hjá Hamri: Gott fyrir félögin að fá stuðning
„Öll hjálp er vel þegin. Margir hafa greitt æfingagjöld hjá sínu félagi en vita ekki hversu mikið muni fást fyrir gjöldin. Þótt ekki margir hafi farið fram á endurgreiðslu æfingagjalda í vor þar sem flestar deildir Hamars lengdu tímabilið fram í júní er ekki víst að við getum gert það sama núna. Það er svo mikil óvissa. Því er gott fyrir félögin að fá allan þann stuðning sem býðst,‟ segir Sandra Björg Gunnarsdóttir, framkvæmdastjóri Hamars í Hveragerði.
Ásmundur Einar Daðason, félags- og barnamálaráðherra, og Lilja D. Alfreðsdóttir, mennta- og menningarmálaráðherra, hafa kynnt umfangsmiklar aðgerðir til að koma til móts við íþrótta- og æskulýðsfélögum landsins vegna þeirrar röskunar sem Covid-19 faraldurinn hefur haft á starf þeirra.
Endanlegar útfærslur á tillögunum verða unnar í samstarfi við íþróttahreyfinguna og gert er ráð fyrir að útfærslan liggi fyrir eigi síðar en 10. nóvember 2020.
Í tilkynningu stjórnvalda eru taldar upp nokkrar aðgerðir:
- Stefnt á að útvíkka úrræði Vinnumálastofnunar þannig að tryggt verði að í þeim tilvikum sem íþróttafélagi eða samstarfsaðilum ÍSÍ er gert að láta af starfsemi sinni vegna sóttvarna geti félagið sótt um styrki vegna launagreiðslna til starfsmanna sem ekki geta sinnt starfi sínu á því því tímabili sem sóttvarnaaðgerðir standa yfir. Gert er ráð fyrir að styrkirnir nemi sömu fjárhæðum og kveðið er á um í lögum um sóttkvíagreiðslur.
- Íþrótta- og æskulýðsfélögum, ásamt sambandsaðilum ÍSÍ, gert kleift að sækja um sérstaka styrki vegna tekjufalls á tímabilinu 1. júní sl. til 1. október sl.
- Einnig verður þessum aðilum gert kleift að sækja um styrki vegna verktakakostnaðar frá 1. október sl. og þar til starfsemi hreyfingarinnar kemst í eðlilegt horf. Orsakir þessa tekjufalls og verktakagreiðslna þurfa að hafa verið vegna sóttvarna á því tímabili sem sóttvarnaaðgerðir standa yfir. ÍSÍ mun sjá um umsýslu aðgerðarinnar.
Hamar er aðildarfélag Héraðssambandsins Skarphéðins (HSK).
Sjá:
Stjórnvöld kynna aðgerðir til aðstoðar íþrótta- og æskulýðsfélögum