Skýrar leiðbeiningar bæta starfið
Þóra Guðrún Gunnarsdóttir mælir með því að íþróttafélög hafi skýrar reglur um hlutverk sjálfboðaliða á viðburðum. Það höfði betur til fólks og geti fjölgað á ný fólki sem vilji taka að sér störf fyrir íþróttahreyfinguna.
„Fólk á ekki að gera hlutina hvert með sínu nefi. Skýr og samræmd umgjörð um starf sjálfboðaliða eykur vellíðan þeirra og öryggi og leiðir til þess að fólk býður sig oftar fram til starfa. Það hefur áhrif áfram. Því það er mín reynsla að börn fólks sem tekur reglulega þátt í sjálfboðaliðastörfum stundar íþróttir lengur en aðrir. Þátttaka foreldra er börnum hvatning,“ segir Þóra Guðrún, reynslubolti í sjálfboðaliðastörfum.
Þóra Guðrún var ein þriggja sem tilnefnd voru til nafnbótarinnar Íþróttaeldhugi ársins 2022 sem er veitt framúrskarandi sjálfboðaliðum. Hinir eldhugarnir voru þeir Friðrik Þór Óskarsson frá ÍR og Haraldur Ingólfsson, sem starfað hefur fyrir allar deildir Íþróttafélagsins Þórs og sinnir mjög stóru hlutverki hjá kvennaliði Þór/KA á Akureyri. Haraldur var einmitt Íþróttaeldhugi ársins í fyrra.
Þau þrjú héldu frábær erindi á sameiginlegum viðburði sem UMFÍ og Íþrótta- og Ólympíusamband Íslands héldu í tilefni af Degi sjálfboðaliðans 5. desember síðastliðinn. Þóra hefur í yfir 20 ár unnið fyrir fjölda félaga, þar á meðal Skautafélag Reykjavíkur og Skautasambandið, og á mótum af ýmsum stærðum.
Eins og góð uppskrift
Þóra tekur undir áhyggjur forsvarsfólks í íþróttahreyfingunni þess efnis að æ færri taki að sér sjálfboðaliðastörf. Hún segir þetta óeigingjarnasta starfið innan íþróttahreyfingarinnar og beri að hlúa vel að því.
Þóra hefur gripið til ýmissa ráða til að snúa þróuninni við. Hún segir það gagnast sjálfboðaliðum og íþróttafélögum að hafa hlutverkaskipan skýra. Ljóst þurfi að vera frá upphafi hvað sjálfboðaliðar eigi að inna af hendi. Það skili sér í meiri ánægju allra.
Þóra er hvatamaður að því að búa til starfslýsingar fyrir öll störf í kringum mót Skautasambandsins og leitast hún eftir því að hafa allar leiðbeiningar eins skýrar og kostur er frá upphafi til enda.
„Hálfu ári fyrir alþjóðlegt mót eins og Reykjavíkurleikana þarf móts stjórn að hefja undirbúning og halda síðan kynningu fyrir mögulega sjálfboðaliða, segjum á Teams. Þar er fyrirkomulag mótsins kynnt og allt það sem sjálfboðaliðar þurfa að gera. Eftir það getur fólk metið hvort það vill skrá sig. Við fáum forsvarsfólk félaga til að minna fólk á að taka þátt. Skráning er á netinu og þar eru ítarlegri upplýsingar,“ segir Þóra, sem leggur áherslu á að mikilvægt sé að ferlið sé staðlað svo að allir viti að hverju þeir gangi.
„Skortur á upplýsingum, umgjörð og ráðaleysi er það helsta sem letur fólk til að taka að sér störf sem sjálfboðaliði. Þau sem aldrei hafa verið sjálfboðaliðar áður þurfa að vita að hverju þau ganga. Eins og í venjulegum uppskriftum þarf að taka allt fram,“ heldur hún áfram og áréttar að þegar leiðbeiningar séu skýrar og unnið eftir þeim verði allir glaðir með niðurstöðuna.
„Við hjá Skautasambandinu höfum lagt okkur fram við að allir vinna með sama hætti á mótum en ekki hvert félag með sínu nefi. Það tók smá tíma að koma því á legg en hefur líka skilað sér í betra starfi,“ segir Þóra.
NÝJASTA TÖLUBLAÐ SKINFAXA
Rætt er við Ástu Katrínu í nýjasta tölublaði Skinfaxa. Blaðið er aðgengilegt í íþróttahúsum og sundlaugum og sent til áskrifenda. Blaðið er líka aðgengilegt á miðlum UMFÍ. Rafræn útgáfa Skinfaxa er mjög aðgengileg og gott að lesa blaðið bæði á umfi.is og issuu.com.
Ef þú vilt koma einhverju á framfæri sem á erindi við íþrótta- og ungmennafélagshreyfinguna þá er um að gera og senda okkur línu á umfi@umfi.is
Þú getur líka smellt á blaðið hér að neðan og lesið það á umfi.is.
