UMSK hlaut Hvatningarverðlaun UMFÍ 2018
Valdimar Gunnarsson, framkvæmdastjóri UMSK (Ungmennasamband Kjlarnesþings), tók við Hvatningarverðlaunum UMFÍ fyrir hönd sambandsins á sambandsráðsfundi UMFÍ sem fram fór á Ísafirði á laugardag. Hvatningarverðlaunin hlýtur UMSK fyrir nýsköpun og nýjungar í starfi á undanförnum árum. Þar á meðal er innleiðing og kynning á nýrri íþróttagrein á Íslandi; biathlon, útbreiðslu pannavalla á meðal sinna aðildarfélaga, skólamóti í blaki og samvinnuverkefni innan UMSK sem snúa að því að auka hreyfingu eldri borgara. Þá hefur UMSK stuðlað að auknu samstarfi með kynningar- og fræðsluferð til Bretlands.
UMSK er stór sambandsaðili UMFÍ en 50 félög eru innan sambandsins af rúmlega 340. Á meðal félaganna innan UMSK eru Ungmennafélagið Afturelding, Íþróttafélagið Grótta, Ungmennafélagið Breiðablik, Ungmennafélagið Stjarnan, HK, Íþróttafélagið Gerpla, UMFÁ - Ungmennafélag Álftanes og fleiri félög sem öll eru að vinna frábært starf til heilsueflingar innan sinna raða.
Á myndinni hér að ofan er Haukur Valtýsson, formaður UMFÍ, og Valdimar Gunnarsson, framkvæmdastjóri UMSK.
Sambandsráðsfundur UMFÍ er æðsta vald UMFÍ á milli sambandsþinga, sem eru haldin á tveggja ára fresti. Einstaklega góð mæting var á fund UMFÍ á Ísafirði enda blíðskaparveður.
Nokkrar myndir frá 42. sambandsráðsfundi UMFÍ.
Smelltu hér og sjáðu fleiri myndir