Ungmennaráð UMFÍ verðlaunað
Uppskeruhátíð evrópskra samstarfsverkefna fór fram í Kolaportinu í Reykjavík miðvikudaginn 11. maí síðastliðinn og var hátíðin haldin í tilefni af 30 ára afmæli EES-samstarfsins.
Hátíðin var skipulögð af Rannís, Utanríkisráðuneytinu, Háskóla-, iðnaðar- og nýsköpunarráðuneytinu og sendinefnd ESB á Íslandi.
Mörg hundruð gestir sóttu hátíðina í Kolaportinu og kynntu sér árangur yfir 40 samstarfsverkefna milli Íslands og Evrópusambandsins á síðastliðnum 30 árum. Auk fulltrúa fyrirtækja og stofnana voru ýmis sendiráð Evrópuríkja með bása í afmælinu og buðu gestum og gangandi upp á gómsætar kræsingar og upplýsingar um löndin, matarmenningu þar og þau verkefni sem unnin eru með fólki á Íslandi.
Gæðaviðurkenning til Ungmennaráðs UMFÍ
Ungmennaráð UMFÍ var með kynningarbás á hátíðinni þar sem ungmennaráðstefnan Ungt fólk og lýðræði var kynnt fyrir gestum og gangandi.
Ráðstefnan leggur áherslu á að efla lýðræðisþátttöku ungs fólks í leik og starfi. Áhersla er lögð á að einstaklingar geti styrkt sjálfsmynd sína og tekið upplýstar ákvarðanir um eigið líf og lífsstíl.
Ráðstefnan hefur farið fram árlega frá árinu 2009 um allt land með mismunandi yfirskriftum. Á hátíðinni hlaut Ungmennaráð UMFÍ gæðaviðurkenningu fyrir ráðstefnuna og þykir hún ein af fyrirmyndarverkefnum Erasmus+.
Ungt fólk og lýðheilsa 2024
Ungmennaráð UMFÍ hefur hafið undirbúning fyrir ráðstefnuna nú í ár. Hún fer fram dagana 20. - 22. september á Reykjum í Hrútafirði. Yfirskrift ráðstefnunnar er: Ungt fólk og lýðheilsa.
Á ráðstefnunni verður fjallað um ýmsa þætti heilsu, þ.e. líkamlega-, andlega- og félagslega heilsu. Að auki verður boðið upp á hellings hópefli, samveru, uppörvandi og hvetjandi vinnustofur og samtal við ráðafólk. Allt ungt fólk á aldrinum 15 - 30 ára getur skráð sig til leiks.
Nánari upplýsingar um viðburðinn í ár er að finna hér.
