11. - 12. október 2024

Starfsemi UMFÍ er afmörkuð út frá lögum UMFÍ.

Lög UMFÍ voru uppfærð og samþykkt á 52. Sambandsþingi UMFÍ 2021 á Húsavík. 

SKOÐA LÖG UMFÍ

Samkvæmt 10. grein laga UMFÍ skulu verkefni Sambandsráðsfundar vera: 

• Ræða skýrslur næstliðins árs.
• Afgreiða reikninga liðins árs, sem skulu áritaðir af löggiltum endurskoðanda.
• Greiði einhver fulltrúi á sambandsráðsfundi atkvæði gegn því að reikningar séu samþykktir, þá skulu þeir lagðir fyrir næsta Sambandsþing til afgreiðslu.
• Afgreiða fjárhagsáætlun næsta árs.
• Ræða viðfangsefni UMFÍ milli þinga.

UMFÍ býður til kvöldverðar föstudagskvöldið 11. október.

Fundurinn hefst kl. 10:00 laugardaginn 12. október. 

10:00 Fundarsetning 

• Kosning starfsmanna fundarins: Fundarstjóri / Fundarritari.

Yfirlit yfir störf frá síðasta þingi

• Skýrsla stjórnar
• Reikningar lagðir fram
• Umræður
• Afgreiðsla reikninga

Mál lögð fyrir fundinn

• Fjárhagsáætlun
• Önnur mál frá stjórn
• Erindi og mál frá sambandsaðilum
• Umræður og málum vísað til nefndar

12:30 Hádegishlé

Nefndarstörf

• Nefndir skila áliti, afgreiðsla mála

Kynning og umræður

• Mót UMFÍ
• Íþrótta- og æskulýðslög
• Svæðisstöðvar íþróttahéraða

16:00 Fundarslit

Ársskýrsla UMFÍ 2024 ásamt ársreikningi 2023 

Ársreikningur UMFÍ 2023

TILLAGA NR. 1

FJÁRHAGSÁÆTLUN

45. sambandsráðsfundur UMFÍ haldinn að Varmalandi 12. október 2024 samþykkir fjárhagsáætlun 2025.

(Sjá viðhengi)

Afgreiðsla mála:

Samþykkt samhljóða.

TILLAGA NR. 2

SVÆÐISSTÖÐVAR ÍÞRÓTTAHÉRAÐA

45. sambandsráðsfundur UMFÍ haldinn að Varmalandi, 12. október 2024, færir ráðherra þakkir fyrir skjót viðbrögð og í framhaldinu stuðning í tengslum við  samstarfsverkefni UMFÍ og ÍSÍ varðandi svæðisstöðvar íþróttahéraða og stofnun hvatasjóðs til þess að styrkja enn frekar áherslur verkefnisins.

Greinargerð: Tillögur voru samþykktar á þingum UMFÍ og ÍSÍ í maí og október 2023. Í desember 2023 var undirritaður samningur við barna- og menntamálaráðuneytið varðandi fjárhagslegan stuðning til verkefnisins í tvö ár og stofnun hvatasjóðs. 

Afgreiðsla mála:

Engilbert Olgeirsson HSK lagði til að í tillögunni yrði tilgreint um hvaða ráðherra væri að ræða, þ.e. mennta- og barnamálaráðherra. 

Breytingatillaga Engilberts var samþykkt samhljóða sem og tillagan í heild.

TILLAGA NR. 2 MEÐ BREYTINGUM:

SVÆÐISSTÖÐVAR ÍÞRÓTTAHÉRAÐA
45. sambandsráðsfundur UMFÍ haldinn að Varmalandi, 12. október 2024, færir mennta- og barnamálaráðherra þakkir fyrir skjót viðbrögð og í framhaldinu stuðning í tengslum við  samstarfsverkefni UMFÍ og ÍSÍ varðandi svæðisstöðvar íþróttahéraða og stofnun hvatasjóðs til þess að styrkja enn frekar áherslur verkefnisins.

Engilbert Olgeirsson HSK lagði til að í tillögunni yrði tilgreint um hvaða ráðherra væri að ræða, þ.e. mennta- og barnamálaráðherra. 

TILLAGA NR. 3

STUÐNINGUR VIÐ SKIPULAGT ÍÞRÓTTA OG ÆSKULÝÐSSTARF

45. sambandsráðsfundur UMFÍ haldin að Varmalandi, 12. október 2024, beinir því til stjórnvalda við meðferð fjárlaga að fjárhagslegur stuðningur við UMFÍ og önnur samtök í skipulögðu íþrótta- og æskulýðsstarfi hækki í samræmi við verðlagsþróun.

Greinargerð: Fjárlög 2025 hafa verið lög fram. Við skoðun á þeim kemur í ljós að áætluð fjárframlög til þeirra samtaka sem eru með samning við mennta og barnamálaráðuneytið er áætluð óbreytt. Þessar áherslur í fjárlögum eru ekki nýtilkomnar og þegar litið er til síðustu 15 ára þá hefur framlagið breyst örlítið og í engu samræmi við verðlagsþróun. Í raun er um verulegar skerðingar að ræða til allra samtakanna. Niðurstöður íslenskra og erlendra rannsókna sýna ótvírætt fram á ávinning fyrir samfélagið af skipulögðu íþrótta- og æskulýðsstarfi og þess vegna þarf að halda áfram þeim stuðningi. Til þess að ná frekari árangri er nauðsynlegt að bæta við stuðninginn. Sýnt hefur verið fram á að hver króna sem sett er í skipulagt íþrótta- og æskulýðsstarf skilar sér margfalt til baka til samfélagsins.

Afgreiðsla mála:

Samþykkt samhljóða – fundarstjóri er mjög ánægður með hversu vel gengur.

TILLAGA NR. 4

ÞRASTASKÓGUR OG ÞRASTALUNDUR

45. sambandsráðsfundur UMFÍ haldinn að Varmalandi, 12. október 2024 hvetur stjórn UMFÍ til þess að gæta hagsmuna hreyfingarinnar í málefnum er varða Þrastaskóg og Þrastalund. 

Greinargerð: Á árinu 2014 var húsnæði Þrastalundar selt en landið sem húsið stendur á er leigt kaupanda hússins. Einnig var gerður rekstrarleigusamningur um tjaldsvæðið í Þrastaskógi.  
Á sambandsþingi UMFÍ 2023 var samþykkt að fela stjórn að rifta rekstrarsamningi um tjaldsvæðið og að láta fjarlægja óleyfisframkvæmdir á svæðinu. Í kjölfar þingsins í fyrra hafa samskipti verið töluverð og mat stjórnar að hagsmunum UMFÍ á svæðinu sé mögulega betur borgið með því að bæta samningsstöðu UMFÍ og uppfæra þá samninga sem í gildi eru.

Afgreiðsla mála:

Tillagan borin upp til samþykktar – samþykkt samhljóða.

TILLAGA NR. 5

ÁFENGISSALA Á ÍÞRÓTTAVIÐBURÐUM

45. sambandsráðsfundur UMFÍ haldin að Varmalandi, 12. október 2024, hvetur aðildarfélög, sem selja áfengi á viðburðum sínum til þess að tryggja aðstæður barna og ungmenna sem mæta á íþróttaviðburði.

Greinargerð: Íþrótta- og ungmennafélög hafa í auknum mæli að undanförnu hafið og/eða aukið sölu á áfengum drykkjum á íþróttaviðburðum sínum. Mikilvægt er að ef félög velja að selja áfengi þá sé slík sala aðskilin frá annarri sölu og þjónustu og að börn og ungmenni sem sæki viðburðina geti gert slíkt örugg og án þess áreitis sem fylgir slíkri sölu.

Afgreiðsla mála:

Guðmundur G. Sigurbergsson UMFÍ lagði fram eftirfarandi breytingatillögu:

ÁFENGISSALA Á ÍÞRÓTTAVIÐBURÐUM
45. sambandsráðsfundur UMFÍ haldinn að Varmalandi, 12. október 2024, samþykkir að fela stjórn UMFÍ að skipa starfshóp sem fjallar um sölu áfengis á íþróttaviðburðum og hvernig hagsmunum barna og ungmenna sé best gætt í því samhengi. Starfshópurinn skili af sér á sambandsþingi 2025.

Breytingatillaga Guðmundar samþykkt samhljóða.